බිසෝ

දණ වටක් දියේ බැස

කෙකටියා මල් නෙළන

බිසෝ නුඹ පෙර පවින්

මගේ පිලේ පැල් බැන්ද

කඩමාලු මල් රෙද්දෙ

මල් හිනා නූල් ගිය

පරදවා ඇඳී යන

නුඹෙ විඩා හිනා රොද

දා බිංදු දිදුලනා

තාලයට හා මුහුව

නිවාලයි දළු දාන

සංතාප සිත් ගින්න

අඩු පාඩු බෝ නමුත්

සෙනෙහෙ නුඹෙ මා ලඟම

හිත කඩා වැටුණු තැන

නෑ කොහේ හොයන්නද

අවාරේ කඩුපුලයි

මගේ පැල්කොටේ නුඹ

බලා හිඳුනුම මිසක

පැන් නොමැත ඉසින්නට

ලැම යහනෙ සතපවා

සුසුම් සෙමෙරය සලම්

නෙත් පියා පන් පැදුරෙ

මුණුමුණුව ගයාපන්

ආ මගට වඩා දුර

යා යුතුයි සිතාපන්

දිවි තුරා සෙනෙහෙ මට

හිත පුරා බෙදාපන්