HONDA

සතියේ පස් දිනම
4.30 කණිසමට
ඉඹුල මත නැගි උදුම්බරාව
වෙනුවට
අජානේය HONDA මත
ලිපිකාර පෙම්වතිය
එක ඉරට දුර ඇදෙන
ක්ෂිතිජයත් අල්ලන

කාපට් මග මතම
නුරාවෙන් ඔඩුදුවන
ඇඟිලි හතරක සෙල්ලම

දෙවටොරෙන් දෙවටොර
බදා කිටි කිටියෙම
මැයි මාර වැට දිගට
පැද්දෙමින් ලතාවට
යන ගමන් අසරු අත
කලවා මිරිකුමක

පිට දවන අව් රැසට
ඔච්චමක් කර කර
වැව් හුලං තාලයට
තානමත් අල්ලගෙන
දකිමි මම පහු කරන
මද මඩින අසරු අත

ලොකු පාලමේ වංගුව
ගිල්ල පසු එක වරම
ඇස් පුරා නලියපු
පුරුදු සිතුවම්පටය
නිතැතින්ම ගිලිහෙන
හීල්ලුම හුළගේ හැර
හනි හනික පියනගමි
බොරළු කැට ගැන ගැන