එතකොට.... මං පුංචි කෙල්ලෙක්

මල් ජංගිය ඇඳන්

එළියට පැනල දඟලපු

කිඹුලන්ට කතා කියන්න

හොරෙන්ම වැවට දුවපු

හැමදාම ඇඳ තෙමෙන්නෙ

වහලෙ හිලක් නිසයි හිතපු

            මං පුංචි කෙල්ලෙක්...

පාට පාට කොළ කපල

සමනල්ලු හදපු

පුංචි ඉඳිකට්ටෙන්

පිස්මේන්තු මහපු

පාන්දර ඇස් වහගෙනම

දත් ටිකත් මැදපු

            මං පුංචි කෙල්ලෙක්...

රෝස සරුංගලේ අරන්

මිදුල පුරා දුවපු

පෙරහැර දා රෑ

මම්මපප්ප පිඹපු

සිල් දාට පන්සලේ

පේර ගැට කඩපු

            මං පුංචි කෙල්ලෙක්...

පුංචි පොද වැස්සටත්

තෙමි තෙමීම නටපු

දුක හිතුණු හැටියෙම

මහ හයියෙන් අඬපු

හැමදාම අම්මගෙ උකුලෙ

නැලවෙන්නම හිතපු

මං පුංචි කෙල්ලෙක්....

එතකොට.... මං පුංචි කෙල්ලෙක්....